WERGEA - It is mei kryst yn Wergea fan t jier itselde as alle jierren mei Sint Piter yn Grou: it komt justjes letter as yn de rest fan it lân. De krystsfear yn Wergea waard it ofrûne wykein fersoarge troch toanielferiening Halbertsma, dy't in stik fan de Ingelske skriuwer Alan Ayckbourn op de planken sette: Elk foar himsels (Absurd Person Singular). In stik dêr't fjouwer pearkes in haadrol yn ferfolje dy't jier op jier mei de krystdagen by elkoar op besite geane.

De 'entree' wie freed- en sneontejûn al bysûnder. Om de besikers fan de toanielfoarstelling yn de kryststemming te bringen waarden krystferskes spile op it histoaryske Van Dam-oargel dat noch hieltyd yn it multi-funksjoneel sintrum De Bidler stiet. Dêrnjonken wie der de oanklaaiing fan de seal, mei kryststikjes, lampkes, in krystbeam en krystkrânskes by de kofje sadat de krapoan 200 besikers per jûn har fjouwer wike yn de tiid weromset fielden.